الاثنين، ٢٤ أكتوبر ٢٠١١

بكل بساطة

اسمي بكل بساطة يحيي 
اسمها بكل بساطة أحلام
من وانا صغير بستغرب الاسم دا
أحلام
لحد ما قابلتها 
فهمته بالتدريج
من مجرد كوني كنت بنام
الي كوني بغوص في عالم الاحلام
احلام ملونة 
صغيرة 
نقية 
اسمي بكل بساطة أحلام
اسمه بكل بساطة يحيي
يحيي من الاحياء 
او دا اللي انا كنت فاكراه
او دا يمكن اللي كنت حاساه
يحيي 
من تحويل دموعي الي ابتسامة 
من احياء قلبي من السكون والجمود
الي الانفعال 
يحيي 
يوميا بيحولني من مجرد بنت
الي اميرة صغيرة 
في مملكة مفهاش غير مواطن واحد

اسمي بكل بساطة يحيي
اسمها بكل بساطة أحلام

أحلام 
يمكن يكونوا سموها كدا
علشان كل يوم احلم بيها حلم عظيم؟
يمكن اسمها ليه علاقة بيها من حيث كونها ف الواقع مش بشرية
ومجرد حلم ؟
او يمكن مجرد وصلي ليها 
وشكل ابتسامتها حلم؟

أسمي بكل بساطة أحلام
أسمه بكل بساطة يحيي

دايما كنت بسئل نفسي 
هي البنات دي عبيطة؟
ازاي بيبقلو علي نفسيهم حد يقولهم اعملوا وسوا
دا اخره ابويا وشكرا
دلوقتي بقيت مستمتعه

دايما بقيت بسئل نفسي
ازاي حركة صغيرة او كلمة 
كنت بسمعها كل يوم 
بقت بتخليني 
بشوف الحياة باللالوان الطبيعيه؟
مع انه نفس الكلام؟
هو انا ازاي ببقي مش انا وانا معاه؟

هو وهي ميعرفوش الكلام دا
مخدوش بالهم ان اسمايهم
بيكونوا معني لطيف
أحياء الاحلام
او
أحلام يحيي

أسمه بكل بساطة يحيي
وأسمها بكل بساطة أحلام
اسمايهم البسيطة
هي ابسط شئ 
في حياة متداخلة
اللي انا كاتبه كان مجرد تخيل
اللي انا كاتبه بكل بساطة
عنهم
عن احلامهم 
اللي بتقاوم النهاية
عن حياتهم الصغيرة الملونة
بلون اللي جربه قبل كدا
بياخد وقت طويل علشان يجربه مرة تانيه
اللي انا كاتبه
مش ليهم علي اد ما هو عليهم
لعل الله يجعل 
من اسمائهم
نصيبا في حياتهم
:)
٢٤/١٠/٢٠١١


ليست هناك تعليقات: