الأربعاء، ١٩ نوفمبر ٢٠١٤

حكاية الكرسي رقم 8





عن أم كلثوم و أحمد رامي

الكرسي رقم " 8 " هو رقم كرسي اللي كان محجوز بأسم أحمد رامي في حفلات أم 
كلثوم 

اللي كان بيروح كل حفلة ومش بيفوتها مهما حصل , ومكنش بيروح غير لوحده .. لابس البدلة بتاعته , مكنش بيأخد حتي مراته

كان بيقعد لوحده تماما , ويعيش ف عالم مكون طبقات صوت أم كلثوم ..
يمكن علشان كدا كل ما كنت بشوف صور أحمد رامي , في بروفات أم كلثوم ومن غير ما اعرف اي تفاصيل , الراجل دا بيحب .. مفيش حد بيتوحد كدا مع صوت بني آدم الا ويكون بيحبه

مكنتش بشغل بالي أكتر من كدا لغاية ما في مرة أتكعبلت في فيديو كدا ليه 
ف الاخر هتكلم عليه وهتفهم ..

 :الغريب ف هذا الحب , هو الآتي

أحمد رامي كان ولهان بأم كلثوم , يذوب فيها عشقا , ولكنه لم يتخطي تلك المرحلة 
للانه كان عنده معضلة 
انه لو قالها وهي وافقت هو عاوزاها تبطل غنا , لانه مش هيسمح لمراته انها تبقي مغنية 
حتي لو هي كانت أم كلثوم ولما اتسئل ليه متتجوزوش ؟
لو تزوجتها لانطفأ الحب! هل سمعت عن رجل تزوج الهرم، أو تزوج نهر النيل؟
وهو عارف كويس جدا أنها عمرها ما هتوافق علي دا مهما حصل
ف أكتفي بكتابة الاشعار ليها

عارف كام أغنية كانت من كلامته ؟ 

110 !!!

منهم " على بلد المحبوب , افرح يا قلبى , غلبت أصالح , يا ظالمنى , عودت عينى ,هجرتك "
انت عارف طيب انه كتب يا مسهرني ك نوع من العتاب انه قلت ف السؤال عليه؟
نرجع تاني للقصة , الرجل لم يصرح صراحة بحبه ليها , ولما جه صديقه حسن الحفناوي وطلب منه تعريفه علي أم كلثوم للاعجابه بيها وافق وعرفه بيها وبالفعل تزوجوا !!

أحمد رامي أيضا تزوج من السيد عطا الله وقبل الزواج حكي ليها عن حبه الشديدة للأم كلثوم ومع ذلك وافقت واصبحت هي وأم كلثوم صديقات.. ولمدة 50 عام كانت صورة أم كلثوم في غرفة نومه

الوضع فعلا صعب للغاية للاطراف جميعها زي ما انت شايف
طيب والست مكنتش ليه بتقفل الباب؟
أعتقد بشكل كبير , حبها ليه كان متلخص ف شعره , مش أقصي من كدا ومكنتش تحب تقفل باب زي باب أحمد رامي
رامي اللي كان بيكلمها مرتين ف اليوم , مرة علشان يقولها صباح الخير ومرة قبل ما تنام

وهي كانت مخصصة ليه يوم الاثنين يوم أجازة دار الكتب التي كان رامي موظفا فيها، ليكون يومه هو بس . في اليوم دا أم كلثوم مش بتقابل حد غير أحمد رامي
ولما جه ف يوم وقرر انه يتجوز , قالت ليه انا عاوز أجي أغني ف فرحك
فرفض وقالها ان أهله العروسة عارفين انه بيحبها

ف الوضع مش هيبقي مريح وصممت وراحت زارت اهله العروسة قبل الفرح ويوم فرحه راحت ليه وغنت ليه " اللي حبك يا هناه ، افرح يا قلبي جالك نصيب " واديتله خاتم فضل مصاحبه حتي وفاته , وف سبوع أبنه محمد جت وغنتله
طيب ومراته مكنتش بتغير عليه؟

ف مرة مراته وأمه كانوا قاعدين وف الراديو أشتغلت الاغنية الجديدة للام كلثوم 
"جددت حبك ليه .. بعد الفؤاد ما ارتاح "
ومكنش قايل للمراته عليها ..
استغلت الام الموضوع وبدأت الكلام مع بنتها أنه رجع تاني لحبه للأم كلثوم 
والغيرة مسلمتش ف قلب مراته ولما رجع تشاجرت الام معاه
حاول يدخل لمراته رفضت , حاول يشرحلها ويبرر انه مجرد قصيدة جديدة , معرفتش تصدقه

ما قبل النهاية :

22 يناير 1975

وهي بتعمل بروفة اغنية " أوقاتى بتحلو معاك....و حياتي بتكمل برضاك " تقع فجاءة من المرض تسافر لندن وتكتشف انها مريضة بالفشل الكلوي
الكون بدأ يتأكل في قلب أحمد رامي وهي كانت تحاول التماسك وتحضر اغاني ل نصر أكتوبر

في 3 فبراير 1975

تندمج اذاعات الشرق الأوسط والبرنامج العام وصوت العرب في موجة واحدة لتعلن الحقيقة.
ظهر يوسف السباعي في تمام السادسة مساء ليلقى النبأ, بينما وقف المهندس سيد مرعي رئيس مجلس الشعب دقيقة حدادا. أرسل الأمير عبد الله الفيصل هدية عبارة عن عدة ليترات من ماء زمزم وصلت مباشرة من الأراضي المقدسة كواجب أخير.
العالم توقف تماما عن الدوران .. الصوت الساحر , الكرسي رقم " 8 " الغيرة ف قلب الزوجة 

كل شئ توقف ..

أم كلثوم تشجو الآن مع الملائكة ..

أحمد رامي أختفي رفض الكتابة , رفض الظهور , رفض الكلام , رفض قبول كل شئ
لا يوجد فيه أم كلثوم

كام مرة باس الخاتم ؟ كام مرة شغل أغنية " هجرتك " وبكي لما بتنزل بصوتها بحنية وحزن لما بتقول " تايه " ف آخر دقايق الاغنية ؟
في الدقيقة 56.26
https://www.youtube.com/watch?v=tJiOT_yInls

كام مرة ؟ بكي فيه ليلا سرا ؟ كام مرة بصت علي صورتها وسئلها مشيتي ليه ؟ 
خلاص هكتب أغنية سعيدة وكلها سعادة بس ارجعي 
كام مرة مسك التيلفون وكان هيتصل بيها؟

كام مرة حاجات كتير قوي يا رامي ..

لغاية ما ظهر ف التأبين ودي كانت آخر مرة كتب وظهر وكتب الكلام دا

ما جال في خاطري أنّي سأرثيها
بعد الذي صُغتُ من أشجى أغانيها
قد كنتُ أسمعها تشدو فتُطربني
واليومَ أسمعني أبكي وأبكيها
صحبتُها من ضحى عمري وعشتُ لها
*أدفُّ شهدَ المعاني ثمّ أهديها
*سُلافةً من جنى فكري وعاطفتي
تُديرها حول أرواحٍ تُناجيها
لحناً يدبُّ إلى الأسماع يَبْهَرُها
بما حوى من جمالٍ في تغنيّها
ومنطقاً ساحراً تسري هواتفُهُ
إلى قلوب مُحبّيها فتَسبيها
وبي من الشَّجْوِ.. من تغريد ملهمتي
ما قد نسيتُ بهِ الدنيا وما فيها
وما ظننْتُ وأحلامي تُسامرني
أنّي سأسهر في ذكرى لياليها
*********************************
أدفُّ = أبحث أو ألخص
سُلافةً = أجود أنواع الخمر بعد أول عصر له
فيديو الرثاء
https://www.youtube.com/watch?v=JWZQKvpfAno

شوف لغة جسدة أرجوك شوف لغة جسده في الثانية 15

احنا بنتكلم علي شاعر , له قيمة أدبية كبيرة , رجل كبير فالسن , راكز مش شاب منفعل ولا مش قادر يسيطر علي مشاعره 
لكن فعلا ف الفيديو الوضع مختلف
الموضوع تخطي فكرة الرثاء , خالص أسمع نبرة صوته من غير الفيديو , الراجل بيبكي
بينتحب ف واقع الأمر

النهاية :

في 5 يونيه 1981 قرر أن ينسحب من الحياة بعد أصعب 6 سنين ف حياته مروا عليه
لم ينجح أي أحد ف اخراجه منه
قرر رامي ، ان يخلع الخاتم .. ويترك قلمه ..
ويحجز الكرسي رقم " 8 " في السماء
يجلس بينما أم كلثوم تبدأ " حيرت قلبي معاك "

*************************************


الاثنين، ٢١ أبريل ٢٠١٤

# 1

قعدت اعيط كتير قوي النهاردة
قعدت احاول اببسط ابويا و امي
ودخلت اكمل بكاء
قعدت اتكلم معاه قوي واسئله سايبني هنا ليه؟
للاحلام؟ ولا ل قلبي ؟ ولا ليها؟ ولا للامي وابويا؟ ولا لمين؟
سايبني هنا ليه قعدت ازعق كتير قوي معاه 
سايبني هنا ليه؟
خدني ريحيني او عذبني 
انا واثق فيك وراضي بحكمك لكن انت سايبني هنا ليه؟
علشان قلبي يتجرح كل شوية او روحي تتكسر علي ولا شئ علشان طموح اخرته معروفة مسبقا
ع الاقل ف النهاية انا هبقي عارف بتعذب ليه
انا مش بقولك كدا وانا مكتئب ولا اي شئ انا بقولك دا وانا تعبان
يارب انا عمري ما كان ليا اخوات
ولا كان ليا حضن
المرات النادرة اللي كنت ف حضن حد 
بعدها علي طول ببقي لوحدي وكانه مسكن 
وانا بكره المسكنات
انا غير مؤمن بجدوي الحياة يارب
ولو اتعرضت عليا الامانة هرفضها ع فكرة من غير تفكير
قولت يمكن علشان رجلي وجعاني يمكن علشان روحي وجعاني يمكن علشان اي شئ 
معرفتش
لما وصلت المكان
كانوا بيقولوا واحد من 15 دقيقة دخل وقال انه معاه قنبلة والناس طلعت تجري كنت اتمني ابقي موجود
علشان اشوف نفسي هعمل ايه هجري واخاف علي حياتي ولا ههخاطر

وانا مروح مع الناس العربية كانت هتتخبط من ناحيتي متحركتش خطوة بينما صحابي نزولوا يشوفوا ايه اللي تم 
وانا كان سؤالي 
ليه مخلصتش 
يمكن علشان بكره العربيات؟
ولو هموت ف انا نفسي اموت علي سريري وف بوقي شيكولاته
ف حتي لو هموت هموت ف شئ انا بكره زي العربيات
وانا بستلم الاكل عيطت
وانا بشتري حاجة سقعة عيطت
لما حد بيشوفني او جي ف اتجاهي بسكت وبمسح وشي
واكمل عياط بعدها
انا مش خايف من الموت ولا الجحيم ولا العذاب ولا الحاجات دي
ف اي شئ هو ارحم من حفرة الجحيم اللي بنقول عليها حياة
انا مش عاوز خير ولا شر
ولا عاوز موعظة ولا كلام بتاع الحب والنور ف اخر النفق
متقوليش متركزش علي الجانب السئ واي هري وكلام سخيف
لما تعرف كويس يعني ايه قلبك ينزف ومكالمة ممكن تخليك تفكر ف الانتحار بشكل جدي
لما تعرف يعني ايه الخوف من رسالة او مكالمة مش ف وقتها الطبيعي
لما تعرف وتستوعب يعني ايه حلم وطموح وقاهرة واسكندرية وحضن وحبيبة وفراق وسفر ووحدة وشتا هتفهم انا بقول ايه 

اقصي شئ ايه حبة حزن
وكل دقيقة هتعدي حدتها هتقل
وكل يوم ربنا هيخلق مسكنات 
وكل ثانية هيطلع مليون بديل

مفيش اي جدوي للحياة بالنسبة لي
كنت بحاول اقنع نفسي بالعكس
لما بشوفها وبمسك ايديها وبحلم زي العبيط بحياة  مشتركة قايمة علي الحضن
وافلام كارتون وبكاء ع الحجر
وصبر وطبطة
بس الحياة مش فراشات ولا قوس قزح
وانا اوسخ شخصية ممكن يتعاش معاها

واي حد بيحبني لسبب مجهول مصيريه يجي يوم ويضحك علي نفسه من غبائه
وعلي وقته  اللي ضاع

لو عندك نصحية 
بجد استفيد انت بيها
متقولش شئ انت مش بتعمله معاك
عاوز تعملي شئ
احضني
او ادعيلي
او اسكت