,
الجمعة، ٢٠ يناير، ٢٠١٢
الثلاثاء، ١٠ يناير، ٢٠١٢
الأحد، ٨ يناير، ٢٠١٢
الأحد، ٢٥ ديسمبر، ٢٠١١
الأربعاء، ٢١ ديسمبر، ٢٠١١
أغنية خاصة
مش فاكر كلمات الاغنية
بس فاكر الموقف
حكيتلي علي الاغنية اللي
كان بيغنوها ليها وهي صغيرة
واد ايه كانت بتفرح لما مامتها كانت بتبقي
واقفه في المطبخ وتسمعها وهي ف اوضتها
ف تجري وتتسحب علشان تسمعها
يمكن صوتها مكنش حلو واقصد هنا مامتها
بس مين بيتكلم علي حلو ووحش هنا
انا بتكلم علي الاحساس
اغنية ليها هي بس
مش لحد تاني
يومها وانا مروح
قعدت أفكر في الكلام دا كويس قوي
بعد تفكير طويل بكيت بشدة
لاني أتاكدت من شئ
اني عاوز أعمل كدا للاطفالي
منها هي تحديدا
****************
ايدي بتدور عليها جنمبي في هدوء انا مغمض عيني
لاني متاكد اني هلاقيها
بس مش بلاقيها جنمبي
أفتح عيني في بط
ابص جنمبي مش موجودة
لسه هنادي عليها
اسمع صوتها
جي من مكان تاني
اقوم بالراحة
اتسحب ببط
اسمع هي بتقول ايه
مع اني عارف ومتاكد
انها بتغني
اشوفها من ظهرها واقفه مستنده علي باب المطبخ
ماسكه في ايديها مج النسكافية بالحليب الزيادة وشعرها كما هو من امبارح
لما عملت ليها الضفيرة
بعد ما تعبتها معايا
اتقدم ليها في بط
اسند راسي علي كتفها
تطبع قبلة علي خدي الايسر
تكمل غنا
تقولي
" كل يوم علي الحالة دي يجي يقف هنا , يفضل يستناها , ويبقي قايم من بدري قوي , ويفضل واقف يبص عليها وهو بيتاوب , ويفضل ينونو وكانه بينادي عليها , بينما هي بتصوصو بره "
اقولها
" يكونش بيحبها "
وانا بسحب نفس عميق من رائحتها احس بالرائحة تخترق كياني وروحي
وتجعلني أقف علي أطراف اصابعي واغمض عيني
ترد عليا وعلي وجهها ابتسامة
" بيحبها ايه بس؟ فيه قط يحب عصفورة؟ "
أرد وانا أحملها فجاءة
" والنبي بوصي لنفسك ملاك زيك رضي يتجوز خرتيت زي يبقي ايه المانع "
تضحك وتضحك وتضحك ونفضل نلف نلف نلف وتغني وتغني وتغني
لغاية ما ف مرة واحنا قاعدين بنتفرج علي فيلم احنا الاتنين علي الكنبة بتاعتنا اللي اختارنها احنا الاتنين في نفسه واحد
وتحت بطاية واحدة هي نايمه علي كتفي , سمعت صوت الموبيل بيقولي انه جالي رساله
فتحت الرسالة لاقيتها هي باعلتلي الفيديو دا
مصحوب بالرسالة دي
" من ملاكك للخرتيت بحبك "
اشوف الفيديو الاقي نفسي أفتكر اد ايه انا محظوظ
بعد ما الفيلم ما يخلص وقبليه بشوية
تكون نامت
اشيلها أحطها في السرير
وقبل ما اقعد علي السرير أبص عليها وعلي نفسها الهادي المنتظم اللي بيدل علي ان الملائكة بتحرسها
مش عارف ليه عنيا دمعت تاني
أقرر أن أصلي ركعتين شكر
لله لانها في حياتي
أقف بين يدي الله
أصلي
وبعد الركعة الاولي
الاقيها واقفة ورايا
وبتصلي معايا
نخلص الصلاة
أحضنها وهي تغني
اغنيتنا اللي انشاء الله هنغنيها لبنتنا
وفقط ننام
الاسكندرية في
21/12/2011
2.42 ليلا
غرفتي
أفكار مشوهة
كل شئ جوايا متداخل لحد العبث .. لوحة عبثية مرسومة بايد أصابها العجز فخرجت مشوهة....
وسط كل مشاهد الدم والقرف والسحل والخيانة والرغبة الشديدة في كسر كل شئ جميل جوانا
وسحلنا زي اي كيس زباله منظره وريحيته مضايقينك
انا عارف ومتأكد من حاجات فكرة الاحباط والزعل والسفر وكل ما شاكلها من افكار بقت رفاهية أتدفع تمنها دم فبقي مينفعش حتي نفكر فيها ولا تيجي علي قلوبنا
والا نبقي زينا زي مجلس العار اللي فاكر نفسه ربنا
الاكيد انهم هيشوفو كل اللي احنا نشوفه وبنعاني منه
سواء في الدينا او في عيالهم او نفسيهم
في الدينا وفي الاخرة
هما عارفين كويس ان جنتهم هنا فبيحاولوا يشربوا منها علشان لما العطش الاكبر يجي يحاولوا يعملوا اي شئ
أنا بكره نفسي .. وبكره أحساسي كل يوم اني عاجز مجرد صوت فاضي جوه فازه مكسورة محطوطة في مكان للزباله مع اني عارف كويس ان الزباله دي هتتشال وان الفازه هتتصحل
دي يقين عندي زي يقيني بالله
بس التمن غالي قوي قوي قوي
كل ما بشوف صورة ولا تصريح للاهالي الشهدا او المصابين او المضروبين او المحبوسين
مش دا اللي بيوجع قد
ان فيه ناس ربنا خلق علي قلوبهم وعقولهم سد
حبة شيوخ ربنا يولع فيهم بجاز وسخ
وحبة نخبة سياسية لفظ وسخ حتي مش يتسهالوه
كلهم لا استثني منهم احد دينية ليبرالية اشتراكية
كلهم بيبوعنا في اول زقاق زي الكلاب
كلهم بيدوروا علي كراسي متعاصه دم
المشكلة انهم مش واخدين بالهم انهم لما يقفوا من قعدتهم
ان مؤخراتهم الكبيرة ستكون متغرقه دم
وان الدم دا مش بيطلع
وان القصاص جي جي
بمزاجهم جي غصب عن عين اي قذر فيهم جي
الكراسي هتروح وهتتكسر وهتفضل القبور واقفه شامخة
حتي كلاب السكك مش حتس بالامان وهي بتمر من امامهم
الحق مش بيضيع
والشهدا مش بيروحوا هدر
مش عند ربنا بس
وعندنا كمان
أي حيوان عامل يتكلم وهو بيلهط العشا في بيتهم علي الاستقرار
ولا اي حيوانية فاكره نفسها المسيح المخلص وبتسئل هما العيال زي عاوزين ايه
واي حبة كلاب سعرانة عامله تنهش في لحم ناس وعاملين يقولك هما ميتكلوش علي اسمائنا
أحب أفكرهم بقول النبي
" من لم يهتم بأمر الامة فليس منها "
انتو عار علي ربنا وعلي البشرية وعلي البلد العظيمة
اللي انا نفسي اعرف ربنا بيحبها ليه لغاية دلوقتي
بس طالما هو بيحبها
يبقي احنا لازم نحبها
مش حبة خيال مآته بيتسمحوا في اسم الدين او السياسية
هيخلوني اكره بلدي
ممكن أموت قبل ما اشوف بلادي زي ما انا بحلم
وممكن لا
بس في النهاية هموت وانا عارف اني عملت أضعف الايمان
اي حد شايفيني بخون وبتكلم بأسلوب مش عقلاني
انزل وشوف بعينك
ولو نزلت وكدبت عينيك خليك فاكر بقي
لما تقابل ربنا
هتقوله ايه وتشرحله ايه
المجد للشهداء
المجد للشهداء
المجد للشهداء
المجد للشهداء
المجد للشهداء
السبت، ١٧ ديسمبر، ٢٠١١
دماغستان: بالصور موقعة مجلس الوزراء
دماغستان: بالصور موقعة مجلس الوزراء: الجمعة 16 ديسمبر 1,30 صباحًا . قوة من الجيش المسؤولة عن تأمين مجلس الشعب خرجت واختطفت الناشط عبودي إبراهيم (عضو ألتراس أهلى ) ...
الاشتراك في:
الرسائل (Atom)