السبت، 5 ديسمبر، 2009

الي الاشتراكية وما بعدهااااااا

الي الاشتراكية وما بعدهااااااا
(مقتبس من عبارة باز يطير من فيلم قصة لوعبه)
.............................................................

علي حسب ما انا اعرف اننا كنا دولة اشتراكية ودلوقتي الحمد لله ربنا فتحها علينا من وسع وبقينا دولة ديموقراطية , وعلي حسب فيلم ((رد قلبي لو سمحت )) الثورة قامت كم اجل الشعب ومن اجل احكاك الحك و عزل الطغمه الفاسده الملكيه ((نيهاههاااااااااااا)) و زي ما انا قولت ان دا رائ فيلم (( رد قلبي وبطل غباوة )) ولان ربنا مش بيرضي بالظلم ولا ان ظابط من الظابط الشطار يتقل مقامه قدام الحته بتاعته (( ابلتك ام انجي )) , فكما نتذكر عندما هبطت عدالة السماء علي كرسي الرجل المشلول وياللعجب قام يصيح باسم مصر ف البلكونه , طب انا متخيل بقي مع اننا المفروض ف ظروف احسن و في اشتراكية اشتراكية مش هزار يعني , وراح واحد قايم دلوقتي وقرر انه ينادي باسم مصر ف البلكونة, انا برده متاكد ان عدالات اللي فوقيهم هتنزله حاجات لطيفة جدا هتخليه يعرف معني الوطنية الحقيقي , خلينا نشوف عقبال ما حولنا من الاشتراكية الي الديموقراطية حققنا ايه من ايه





مادة(1): جمهورية مصر العربية دولة نظامها ديمقراطي يقوم علي أساس المواطنة والشعب المصري جزء من الأمة العربية يعمل علي تحقيق وحدتها الشاملة

مادة(3): السيادة للشعب وحده، وهو مصدر السلطات، ويمارس الشعب هذه السيادة ويحميها ويصون الوحدة الوطنية على الوجه المبين فى الدستور.

مادة(73): رئيس الدولة هو رئيس الجمهورية، ويسهر علي تأكيد سيادة الشعب، وعلي احترام الدستور، وسيادة القانون، وحماية الوحدة الوطنية، والعدالة الاجتماعية، ويرعي الحدود بين السلطات لضمان تأدية دورها في العمل الوطني.



برده علي ما افتكر و العهدة هنا علي مجلة ((سمير , وان كانت هناك آراء تشيع انها تتلقي تمويل خارجي )) أن فكرة الاشتراكية كانت قائمة علي ان تكون السلطة في يد الشعب , امممم خلينا نشوف كدا

1-محمد نجيب (عسكري)
2-جمال عبد الناصر ( عسكري )
3-السادات (عسكري )
4-مبارك (قائد سلاح الطيران يعني عسكري برده)

ماشي في داهية الشرط دا ندخل علي موضوع تاني

مادة(23): ينظم الاقتصاد القومى وفقا لخطة تنمية تكفل زيادة الدخل القومى وعدالة التوزيع ورفع مستوى المعيشة، والقضاء على البطالة وزيادة فرص العمل، وربط الأجر بالانتاج، وضمان حد أدنى للأجور، ووضع حد أعلى يكفل تقريب الفروق بين الدخول.

مادة(33): للملكية العامة حرمة، وحمايتها ودعمها واجب علي كل مواطن وفقا للقانون،

مادة(35): لا يجوز التأميم إلا لاعتبارات الصالح العام وبقانون، ومقابل تعويض.

مع بداية الثورة والعهدة هنا علي ((سمير و بلبل )) ان الثورة اخذت الثروة والعقارات وكل شئ من اجل العمل علي اعادة التوزيع علي من يستحقها دون سلب او نهب , المشكلة حاجه بسيطة انهم ادو الحاجات دي للاغنياء نص نص وخلوهم اغنياء قوي وبالنسبة لمحدثين النعمة اللي مقدروش يتسحملو التغيير فقروا بيع نصبيهم الي الاغنياء قوي وخلوهم اغنياء غني فاحش و اللي استحمل بقي ف مجلس الشعب , لدرجة ان بحس دلوقتي ان الناس دي اوحت لمبدع شخصية (( عم دهب )) مع كامل احترامي لعم دهب


مادة(2): الاسلام دين الدولة، واللغة العربية لغتها الرسمية
، ومبادئ الشريعة الاسلامية المصدر الرئيسى

مادة(16): تكفل الدولة الخدمات الثقافية والاجتماعية والصحية، وتعمل بوجه خاص على توفيرها للقرية فى يسر وانتظام رفعا لمستواها

. مادة(17): تكفل الدولة خدمات التأمين الاجتماعى والصحى، ومعاشات العجز عن العمل والبطالة والشيخوخة للمواطنين جميعا، وذلك وفقا للقانون
. مادة(18): التعليم حق تكفله الدولة، وهو الزامى فى المرحلة الابتدائية، وتعمل الدولة على مد الالزام الى مراحل أخرى، وتشرف على التعليم كله، وتكفل استغلال الجامعات ومراكز البحث العلمى، وذلك كله بما يحقق الربط بينه وبين حاجات المجتمع والأنتاج.


*مجانية التعليم * مجانية العلاج *الديموقراطيه *القضاء علي البطاله (ودي تحديدا علي عهدة مجلة علاء الدين) , الاعتقال السياسي و الاعتقال بصفة عامة , وبتعجبني ان الدين الاسلامي مصدر التشريع البند دا تحديدا بشوفه عامل زي الرسوم المسئية لان لو دا النظام الاسلامي , اللي في فترة من ازهي عصور العرب و المسلمين والتاريخ الانساني كان شئ يتضرب بيه المثل ف النزاهة و الشرف و الكرامة و الوحدة هو هو نفس النظام اللي بيتطبق دلوقتي وبقينا عاملين كدا , يبقي الحمد لله احنا اثبتنا ان الدين بيتغير مع تغيير الناس وليس العكس المبادي لاتتغير بينما الناس هي من تتغير , وكما يقال الحق احق ان يتبع ,

أتخيل لو (كارل ماركس ) مازال علي قيد الحياة و جاء الينا من عامين قبل الغاء الاشتراكية ونظر الي ما صنعته لحيته او شاف الحكومة المؤلفه من رجال اعمال مش كان كفر بالاشتراكية كان سب الدين للينين بس كان برده هيبص للجانب المشرق للموضوع ان مش كل الاشتراكية انتهت هو تم اختزالها ف ثلاث اشياء

1- اشتراك الترام 2-اشتراك النت 3- اشتراك الوصلة

كان زمان مصيره زي مصير (عبدو الاستقراطي ) اجدع من رايته يبيع نفتلين بليه ف الاشارات
كان يقف ويفرد ذراعيه ويجري بين العربيات ويصرخ
الي الاشتراكية وما بعدها

المشكلة ليست ف مصطلح المشكلة ببساطة ف العمل
العمل اللي ممعمول للبلد دي ومربوط ف رجل طائر عنقاء

الي لقاء .

الاثنين، 3 أغسطس، 2009

الرجل الاول


بسم الله الرحمن الرحيم


نظرا لان الرجل التاني و الرجل التالت تم التحدث عليهم من قبل زملاء فيجب علي الواحد يخلي عنده دم ملوث و يحترم نفسيته و يكتب حاجه جديدة بالصلاة ع النبي
علشان اللك الكتير بيجبلي هشاشة ف العظام

عن الراجل الاول نتكلم واضحه يعني من الاسم

انيه راجل اول

هو راجل انا بكن ليه كل من عزة و منال

كلنا نسمع عن اول واحد اخترع الراديو

او عن الرجل الاول اللي خترع التيلفون

و اللي اكتشف الكهربا

و اللي اكل الدوم اول مرة علي رايي جورج

و اللي اخترع السيما

و اللي اكتشف دواء معين

كل دول معروفين بالنسبة لينا ماعدا الراجل بتاع الدوم نسبيا

لكن الراجل اللي انا بتكلم عليه دا معجزة متحركة عقل ذري لا ينافسه غير الجهابذة ف العلم ف كافة الفروع و بجد نوبل اجحفت ف حقه ازاي ((
ماخدش )) الجايزة لغاية دلوقتي

الراجل هو بكل فخر اللي اخترع





2 =أ,ء,ئ
3 =ع
3' = غ
4 = ذ
5 = خ
6 = ط
6' = ظ
7 = ح
8 = ق
9 = ص
9' = ض

و في راوية تانيه و الله و اعلم ان ولا 4 ولا 6 ولا 9 مش موجودين و ف رواية تالته ان حرف غ يمكن كتابته = 8و الله و اعلم

بجد يعني راجل وهميييييييييييييييييييييييييييييييييييييييييييييييييييييييييييييييييييييييييي

نفس اشوفه ولو مرة واحده اتليام عليه بس مش هعمل فيه حاجه واصورها فيديو و اخليه عبرة لمن يعتبر و لا هعذبه و اقوله قول " انا راجل عربي " صدقوني مش هيوصل لكدا

المشكلة ف الراجل دا نفسي بجد اشوف اول مرة حصلت بس يعني , يعني مثلا جي يكتب كلمة ياعم فقالك لسه هيدوس علي ((ع)) لا يا سيدي ال ((3)) مثلا يعني؟

طب رد فعل اللي اتبعتله ايه موقفه؟

المشكلة انه طالما اكيد الموضوع استمر فاكيد رد الفعل كان مثلا

" eih d2 d2 g2med 2ker h2g2 lolololololol"

الترجمة

" ايه دا , دا جامد اخر حاجه , ضحكات"

لمزيد من المعلومات عن القاموس يرجي محادثة المؤلف عرض خاص بادر قبل نفاذ الكمية*

يعني هي وصلت ف الكسل للدرجة دي , خلاص يعني ربنا هيحاسبك لو كتبت عربي او انجليزي بس

يرد عليك واحد او واحده بتستعبط وعامله نفسها واحده


"ya 3am d2 29lo 2sahl "

بالتعاون مع الموساد فهمنا الشفرة و طلعت النتيجة

" يا عم دا اصله اسهل "

*الكميات قاربت علي النفاذ و عهد الله

بجد يعني حاجه تخليني فخور و ابقي عاوز (( اديله)) كل حاجه عندي بصراحة يعني من حب و وفاء و بالذات وفاء يعني اصلها بنت عشيريه

فهمنا اننا كسالي ف الشغل و ف الدراسة و العبادات و ف الرياضيه و ف السياسية و ف الادب و ف الكسل نفسه لكن دا ولا حاجه

حرفيا ولا حاجه

جرب تقراها وانت متعرفش الشفرة يالهوي يا خراشي ممزوجة بيعع

ليه يعني يا عم الراجل الاول خلاص ضاقت عليك من كل الكوكب ,

سيبك اني عندي فوبيا من الارقام و بتصبيني بتوتر بشع كانها ممثل من الحزب الوطني يتحدث عن مستقبل البلاد

خلاص يعني كلامك مهم لدرجة انك تعمله شفرة

بتتكلم ف اقتصاد غانا يعني ,

تتخيل بقي لو فيه مناقشة حامية الوطيس بغض النظر عن الوطيس دا , هيبقي شكل المناقشة ازاي؟

او لو عركة ؟ او لو قصيدة شعرية

y2 l2il2 k2m oh72bek t2le 2la k2lbe

" ياليلي كم احبك تعالي الي قلبي "

* معلش حظ سعيد المرة القادمة القاموس كل سنة و انت طيب


طب دلوقتي الراجل خالد الذكر دا يعني محدش يعرف سكته علشان افهمه غلطه بس مش اكتر

اصل الموضوع ولا ينرفز ولا اي حاجه

دا عادي يعني كل الموضوع انك بس بتحس انك ف الحرب العالمية التانيه

و انك الماني بتكلم الحلفاء علشان محدش يقطع عليك ان جاز التعبير


متشكرين ليك ايها الرجل الاول
روح الهي و انتي حجاهي يجيلك

25565665544 ومش كدا و بس لا

و 5456400054442265

ماشي يا 549+59666652100056525




الأحد، 2 أغسطس، 2009

سخافات لا نهائية المرونة


بسم الله الرحمن الرحيم

قبل ان ابدا اراهن ان هناك من يري سخيف لمجرد انه قراء الاسم , نعم ,

,لكن ارجو منكم ان تتقبلوا مني سخافتي القادمة لعلي لا اكون سخيف ,

,بداية اليوم السخيف المنبه الازلي بجوارك يعلن لك انك متأخر عن شئ ما تقوم كمن لدغه عقرب تفعل كل شئ يجعلك سخيف ومتأخر

,تبحث سجائرك السخيفة فقط لتكتشف انها فارغه ,تنزل لكي تركب اسرع مواصله اوجدها الانسان الا وهي الترام

,وانت في الطريق تبحث عن سجائر ليس علي الارض

تلك مرحلة متقدمه ولكن ليس الان ,

تشتري بالاموال القليله التي معك تنتظر الترام المنقذ فقط لتعلم مدي سخافة هذا الاختراع المسمي بالترام

يأتي وياليته لم ياتي مزدحم كيوم القبض

,تركب فقط لتسمع الجمل السخيفة علي غرار هوا الجو حر ليه؟والماتش امبارح كان في الهوبا ,

تذاكر يعلنها الاخ المحصل و كانه احد ملوك الروم

,تخرج ما تبقي من الاموال السخيفة تعطيعها للمحصل الذي يتعامل معك كأنك ذو القرنين لسبب انت تجهله بالطبع

,تصل الي مكانك متأخر فقط لتجد انك اول الوصلين ,تنتظر في ملل بشع وفي هذا الجو السخيف ,

يرن هاتفك بتلك الرنة السخيفة لتري ان اسخف مخلوقات الله بعد العنقاء مباشرة يتصل بك اكيد ليطلب منك مال او

نصيحة سخيفة ,تغلق الهاتف ,(يالها من حركة سخيفة!!)

,يأتي من كنت تنتظرهم ,تسمع كل المبررات السخيفة الممكنة ,من أول صحيت متأخر انتهاءا اخويا تم خطفه في العراق ,تذهبون الي السينما فيلم خالد لممثلين خالدين اينعم الفيلم يحتوي علي 7 اغاني كلها علي غرار (والعيال يخافوا مني ويقولوا العبيط اهو , العبيط اهو )

,تلعن اليوم الذي دفعت في اي مبلغ لتلك السخافات , حتي وان كان مجانا ,فقط تنظر لهم لتجد منهم من يبكي من كثرة تاثره من الدراما والعبر التي يحتويها الفيلم ,

تذهبون الي الكافيه تجلسون لكي تتحدثوا ,فجاءة تجد ان الموضوع المطروح للنقاش هو (مقارنة ما بين كشري ابو عطوة وكشري السيدة) ,تنظر لهم في صمت يالتلك السخافات اللعينة ,تتفرقوا ,تذهب الي بيتك لتجلس علي النت لتجد مئات الرسائل من نوعية (ان لم ترسلها فسوف تحترق في الجحيم

, او دعوة (لللاعتصام الحر من اجل البلد الحر) ,فقط ينقص عبارة (يسقط الاستقلال, ويا عزيز الكأس كان للانجليز) ,تقرأ اخبار لطيفة عن تعديل ظريف لما يدعونه كذبا دستور ,تقراء خبر تاني عن مدي وضاعة الحكومة وضعف ادائها ,تكره الحكومة و المعارضة و البلد ونفسك

,تترك كل هذا وتلعب فيفا فقط لكي تهزم من فريق مغمور وتخرج من الكأس ,

,تبدأ اسطوانة "قوم يا ابني ذاكر علشان مستقبلك المشرق" ,تجلس لتقرأ اي شئ حتي وان كان ميكي ,فقط

لتكشف ان ميكي ورفاقه عملاء للنظام الامبيرالي ,كم كنت سخيف علي مدي تلك السنوات ,تقرر ان تنام بعد تلك الليلة السخيفة ,فقط لتكتشف مدي سعادتك انهم اختارو عمارتكم لتصوير الجزء الثالث من فيلم قراصنة الكاريبي ,يعني السلم هيتغسل ,

.....تنام جاهدا فقط لتجد المنبه الازلي بجوارك يعلن لك انك متأخر عن شئ ما

الجمعة، 31 يوليو، 2009

حبيس الغرفة


بسم الله الرحمن الرحيم


خامس يوم يعدي عليا و انا قاعد ف اوضتي , مش بطلع منها الا للحمام و الاكل , دا مش رقم

قياسي ولا اي حاجه انا عمري 23 عام قضيت

منهم 20 مثلا زي كدا يمكن مش قوي كدا يعني بس مش تفرق كتير عن دا

اصعب شعور ف الموضوع دا

فكرة انعدام وجود صوت بشري حولك

خد بالك معايا الفترة اللي قولتها الطويلة دي ما كنش فيها جهاز كمبويتر

يعني لا صوت علي الاطلاق

ساعتها وعلشان متتجننش بتفكر ازاي تملا الفراغ من غير ما تذلل لحد

و تقوله اسمعني

او حسيني

او حبيني

او انا هنا شايفيني

حاجات زي اصوات العاملين ف 140 دليل بتبقي مسلية جدا

اي كلام

لمجرد تسمع اي صوت

غير صوت الصمت لو افترضنا ان الصمت ليه صوت اصلا

المشكلة حتي وانت لوحدك جدا

زي حالتي دي لا بتهش ولا بتنش

برده تلاقي نفسك

غلطان ف حاجات ما تعرفهاش

لو اتكلمت فانت غريب و بتقول كلام اغرب

لو سكتت بتبقي كئيب و بتحاول تعيش نفسك ف جو من الكائبة و السواد

المشكلة اللي بيقولك مش بيكون جرب يعني ايه يعني تلفيونك

بالشهر مش بيطلع اي صوت

علشان يفكرك انك لسه عايش

او مجرد فكرة

وجودك ذو قيمة

مش فكرة اتصال او اي حاجه

فكرة

انك

عايش

فكرة انك مش لازم تشتحت علي نفسك علشان حد يتصل

مش لازم اكون بعيط علشان اكون حزين و علشان تاخد بالك ان فيه شئ

مش لازم اكون فرحان و بغني علشان تاخد بالك ان الدينا حلوة معايا

جدران اوضتي بحبها علشان السبب دا

عمرها ما اشتكت مني

عمرها ما طلبتني باي حاجه

و ف نفس عمرها ما حضنتني

ف الواقع مفيش حد حضني

غير مرة و مش حاببها

ولا عاوز حتي افتكرها

يمكن اكون محبوس جوه اوضتي بمزاجي

بارادتي

يمكن صح

يمكن اكون انا الغلطان و كل الناس دي صح

يمكن

يمكن انا اكون بضيع كل وقتي ف ولا حاجه

وبدور علي حاجات تغمني

و بدور علي حاجات تخليني نكدي و مقرف يمكن

يمكن

بس بيبقي نفسي حد يجي يديني بالقلم

و يقولي انت احسن من كدا

ما تشتحتش علي نفسك

ما تخليش حد يطبب عليك او تخلي حد يحضنك

علشان انت ضعيف

خليه يحضنك علشان انت تستحق الحضن

..............................................
بجد دلوقتي محتاج اشوفها قوي

بجد جداااااااااااااااااا

نفسي انام ف حضنها

و افضل اعيط لغاية ما انام

اكيد مش هتشتكي

اكيد مش هتسبيني و تمشي

اكيد مش هتقولي انت بتعيط ليه علي الاقل وانا بعيط

اكيد مش هتزعل مني و تقولي انت ليه نكدي و مقرف

بجد بحبها قوي

ومحتاجك قوي

(أمي ستنا خديجة)

ابنك

مصطفي

الأحد، 14 يونيو، 2009

مش عارف


بسم الله الرحمن الرحيم

مش عارف

................................
حاسس اني ماشي شارع لا نهائئ و اني رجليه بدات تدوب من فعل المشي , حاسس بجلدي و لونه و شكله بقي متغير , لا فيه نور ف آخر الطريق ولا حتي معايا فلوس اشتري بيها كوبيه علشان اشوف نصها المليان , الفكرة بقي اني مش عارف بضحك ليه؟ عارف عامل زي ما تكون قاعد وسط ناس كتير و الاوضه زحمة , لكنك حاسس بفارغ رهيب و وحدة غريبة بتبقي عبارة عن وش بيضحك علي اي كلمة , ايد بتسلم علي اي حد , وراس تهزها مع اي كلام , لا انت سامع ولا انت شايف , كل ما تقف مع حد تلاقيه يتكلم و يتكلم ...

ليه محدش يحضن حد مرة واحدة؟

و التاني يستوعب

بس برده بضحك و مش عارف ليه.....

........................................................................
نايم


شوفته و انا راكب المشروع حاضن صندوق المناديل و حاطط النظارة ف نص راسه و ايد علي الارض مدلدله و ايد تانيه جوه الصندوق و راسه سانده عليه و نايمممممممممممممممممممممممممممممممممممم بعمق
لا سامع صوت عربيات , ولا شتايم الناس , و لانظرات الناس اللي ف العربيات الغالية بتعدي من جسمه , هو البحر ف دهره زي " يونين اير " الرصيف زي كنبة من " أمريكان فرينتشير " , رايحة الارض و العادم زي " هوجو بوس" , مش بيفكر ف التعديل للدستور , ولا ف هزيمة " حسن شحاته " و لا ف مصاريف جواز " هيفاء " , ولا علي مدي براءة " طلعت مصطفي " , او ان وزارة الصحة العالمية صعدت الوباء لانيه مرحلة , نايمممممممممممممممممممممممممممممممممممممممممممم
بكره ليه فعله , و النهارده ليه أمره , باع مبعاش , مش هتفرق كتير , اللي ف الجيب للغير , فضلت باصص , لغاية ما المشروع ما مشي , لوحت رقبتي فضلت باصص و برده فضل لسه محافظ علي مستواه و
نايممممممممممم........



الأربعاء، 10 يونيو، 2009

رؤية نقدية لاغنية العربية (كل اللي فات)تامر حسني

بسم الله الرحمن الرحيم

رؤية نقدية ف الاغنية العربية
...........................................
أعزائئ الطلبة و الطالبات طلاب المرحلة النهائية
يسعدني ان اقدم ليكم ملخص ف مادة الاغنية العربية اصول و مناهج , وذلك ف اطار المراجعة العلمية لهذه المادة التي اشرف بشرحها
و الان مع الاغنية الاولي , مع نجم الكيل و نجم الاغنية
تامر حسني و اغنية كل اللي فات


"هنا كما نري اول لقاء , وقبل التعرف التام"



كل الي فات من عمري عدى كأنو ساعات اول ماشفت عنيك

ان الراجل بيقول عمره اتكر قدامه زي البلوفر الانجليزي سئ الصنع عندما راي اعين حبيبته , ذلك لسبب من ثلات
1-الصدمة
2-هول المفاجاءة
3-عادي يعني

ياحبيبي اه هعيش معاك طول الحياه بس هعشق فيك

نري استخدامه لاسلوب توكيد (اه) لان حبيبه (و لم نحدد النوع هنا لترك عنان الطالب ف التخيل عن جنس الحبيب) تقريبا كانت ترواده الشكوك ف احتمالية العيش معه , و يؤكد ليه انه سيعيش معه فقط من اجل ان يعشقه , مع اني اري صعوبة تلبية نداء الطبيعه ف تلك الحالة , ولكن الشاعر اصر علي ذلك , مما يجعلني اخلي طرفي

ده ألي زيك انت يتشال ع الراس وماينزلش ده ألي زيك انت يأمر وكلامو كلو يمشي

اري انها قمة الرومانسية و ايثار النفس , فهو يعرف ان وزير الصحة كرم الله خطاه قد أمر بغلق مترو الانفاق الي الانتهاء من انفلونزا الخنازير و الطيور و العادية و الكحه و البلغم , وطبعا لن يرضي ان تركب الموصولات العامة مثل الاتوبيس ابو 3 جنيه او تاكسي العاصمة , او الميكروباظ , و سلم لها زمام الامور , من باب الاستسهال , بل اعطاها الحرية ف ان تامره و هو عليه الطاعه , مما يتشابه بالاجواء القديمة بتاع الف و خمسمية ليلة وجو الريش و الحاجات دي , و لكن السؤال الذي يطرح نفسه , ماذا تلبية نداء الطبيعه فوق؟ و الاكل و الشرب؟

هوا انا عارف انام من يوم ماعرفتك ياحبيبي على طول سهران مش لاقي كلام يوصفلك تعذيبي

تقريبا هنا ف هذا المقطع هو متاثر او كتب هذا المقطع ف احد اقسام الشرطة ف سويسرا , و قلة نومه منذ معرفته لحبيبه (مجهول النوع) و بحثه عن كلام اصابه بلوثة ما , ارجح ان الحبيب المجهول هذا كان مريض بمرض معدي , فهو منذ البداية و هو راي حياته تمر من امامه و الان لا يقدر علي النوم , ولا يجد كلام , بيتعذب , تقريبا لان هناك صورة معه ك ذكري و الموضوع سينقلب الي فوبيا , ربنا يستر
هقولها وخلاص بعشق عنيه وبحبو ياناس مهما عمل فيه ومن الليلة دي هبدء حياتي من اللحظة دي وايدك فـ ايدية

هنا تحدث الصدمة ,تقريبا عرفنا نوع الحبيب , و لكن اقدم علي الانتحار , لاحظ , " هقول خلاص " , " مهما عمل فيه " , " و ايدك ف ايديه" , الكلام تشعر انه منبئ بشئ بشع , و ذلك نظرا لحالة الاغنية بصفة عامة , و تلك الصدمات العنيفة التي تلاقها , من نوع الحبيب , لعيونه ل كله بصفة عامة , لكنه تماسك ثم ف النهاية انهار تماما




"هنا نري النهاية الماساوية عند اكتشافه للحقيقة"

ملخص الاغنية :

1- أن العمر جائز جدا يعدي امامك دون اي مانع او كونك مقبل علي الموت و ربما بسبب جوز من العيون

2- اننا ك مصريين من الممكن أن نتغلب علي البوذيين من حيث اننا نقدر علي الاستمرار ف الحياة فقط علي العشق و اننا نقدر نشيل من نحب (بغض النظر عن النوع ) علي الراس مدي الحياة و ذلك يدل علي المعدن النفيس الذي نكونه

3- ان الحبيب (بغض النظر عن نوعه ) يقدر علي ان يعمل ف الموساد ( جهاز المخابرات الاسرائليه ) دون اي وساطة وذلك نستدل به من خلال البيت الذي يقول "هو انا عارف انام من يوم ما عرفتك , علي طول سهران , مش لاقي كلام يوصفلك تعذيبي " كما نري مدي براعته

4- الاعتراف سيد الميدالية , و ان الصدق مناجاة , ومن حفر حفرة لاخيه عادي يعني ما الشارع كله اصلا محفر


و بهذا اعزائئ الطلبة و الطالبات نكون انتهينا من الصفحة الاولي من الفصل الاول من المجلد الاول و كان الله بالسر عليم
الي لقاء قادم
مع اطيب التمنيات بالنجاح و التصفيق.
أ.د.ض.ح.ع.ي/مصطفي سليمان


الثلاثاء، 14 أبريل، 2009

كله ألا

بسم الله الرحمن الرحيم

كله ألا النيش
(مرثيه ف حال شاب نسي الاصول)


الأجواء ممتلئة بدخان السجائر , الكل في حالة توتر , هناك موسيقي الأب الروحي في الأجواء , الكل ينظر إلي الرجل في البدله السوداء ينتظر الحكمة في صورتها الخام , العرق يتصبب مني كشلالات نياجرا , ينظر لي و يقول : سأعرض عليك عرض لا يمكنك رفضه , بعد أن أبعدت عازف الكمان عن طريقي لكي أري حماي , في المستقبل و اقصد هنا المستقبل كمستقبل حرب الكواكب , أشعر أن في أي لحظه سأصاب بطلقة في جمجمتي نظرا لتجرئئ و قدومي هنا , هذا الصالون القوطي الذي نجلس فيه لا ينقصه غير بعض لمسات جماليه ليصبح معبد لآكلة لحوم البشر , و أكاد اجزم أن أسفل تلك الكنبة هناك جثة أحد الأخوة السابقين الذين للأسف لم يمهلهم القدر في أعادة التفكير أن الزواج أمر سهل ,رحمة الله علي الجميع , اختصارا للأجواء العالم السري للزواج هناك شقين الأول الطلبات و الثاني هو المتطلبات , و الآن الطلبات

طلب رقم 1 :

العمل و متطلباته ( دراسة نقدية في العمل الحر الرجاء مراجعة الناشر)
المقطع الأول من الجزء الخامس في كتاب شروط القبول
1- أن يكون العمل ثابت ( بمعني يكون العامل اللي هو أنا مرتبط بعقد مع مكان العمل الذي لم أعمل بها بعد )
2- أن لا يقل المرتب عن 3000 ( و أنا الذي اعتقدت أن صديقي الذي أخبرني أنها رأي العنقاء أمس في نادي سبورتنج أحمق !! )
3- (هام جدا ) أن يكون " يفتح بيت " ( لم أفهم هذا المصطلح ما حييت , هل هناك نوع من العمل يفتح شئ أخر كزجاجة بيبسي مثلا؟ أو علبة تونة قطع؟)
4- أن يكون العمل يتضمن التامين الصحي و النفسي , و أن يكون قابل للزيادة و هناك حصة في الأرباح ( حقا لا تعليق )
5- أن أقدر علي المواصلة بها ( حتى و أن كنت أكل الأطفال الرضع )


طلب # 2

الشقة ( رجاء مراجعة تان تان شخصية كابتن هوك و جملته الأشهر ألف لعنه)

1-ليس من الضروري أن تكون في منطقة راقيه لكنها لن تقل عن أربع غرف و صالة و تطل إما علي منظر طبيعي أو علي البحر ( الآن اعرف أهمية التامين الصحي )
2- غير قابل للنقاش أن تكون أيجار جديد أو قديم أو حتي من العصر الآشوري أن لم تكن تمليك فسحقا لك

3- طبعا القصص الخيالية أنك تعيش بمفردك و شقتك واسعة ولا يسكنها غير أنت و والدتك غير مقبولة ( كقبولك أن تتزوج بيضاء الثلج أحد الأقزام (يععع) )

4-الحالة الوحيدة التي تجعلك تعيش في منزلك إلا يكون منزل إن يكون شئ أخر ( لن أقدر علي ذكره هنا و لكنه يبدأ بحرف ف و ينتهي ب لا) وحتى هذا لن يشفع لك لابد من تجديد شامل

5-عند حصولك علي الشقة ( هااهاااااااهااا ) تبدأ الأعمال التخربي... أحمم .. أقصد الأعمال الإعدادية و هي التبييض أعمال المحاراة , الكهرباء , الخ ...

6-أمامك مدة طويليه للحصول و العمل علي تلك الأشياء 3 شهور ( مع مراعاة أن في الأساس أعمال المحاراه و كل الأشياء السابق ذكرها ستتعدى علينا بالضرب و بالزمن بما يزيد عن 5 شهور )


طلب # 3 ( هل مازالت تصدق أني علي قيد الحياة ؟؟؟ )

تتتررراااااتتررراااااااا



الشبكه

لا لن تكون ماس أو ياقوت أو زمرد فانا لن أتزوج الأميرة ياسمين و أن كنت بدأت الاعتقاد أن هذا فعلا ما سيحدث لذلك أن فوجئت بالجني لن أصاب بصدمة عصبيه و تلك أحد فوائد التامين الصحي السابق ذكره

إما أن تكون عيار 24 ( الجرام الخام دون أي شئ = 485.5)

أو تكون عيار 21 (هل تعرف أسطورة أل 21 جرام التي تقول أنها وزن الروح؟ لا اعلم ما آتي بها إلي عقلي الآن , نسيت إخباركم إن كانت 21 ستزيد الأشياء فيها سيكون طقم علي سبيل المثال )




القسم الثاني :

:( المتطلبات (:


أن اجتزت كل تلك العقبات أن كانت دي عقبات في الأساس و ليس وسيلة إعدام سليمان الحلبي ستكون علي موعد مع التسالي , هناك شخص ما أعتقد اعتقاد ما انه من الصواب أن يتم دفع مهر و مؤخر و أن الماذون يأخذ نسبه من المؤخر و أعتقد أيضا أنه نفس الشخص الذي فكر أن الذهب سيكون شئ مناسب للزواج ( حقا كم أود أن أراه , فقط أراه , لن ألمسه و لكني سأجعله يري ما صنعته يداه ) , الغريب في الأمر أن التفسير لوجود شئ يسمي الشبكة ( وتلك غير مجلة الشبكة ذائعة الصيت في المرحلة الثانوية أو شبكة الانترنت ) أن يتم بيعها عندما ما تحتاج أموال , الشئ البشع التالي أعتقد أن نفس الشخص أقترحه أيضا و يا له من محظوظ هذا الوغد , وهي .....



التقسيمة المقدسه

العريس عليه غرفة النوم , المطبخ , الصيني و الفارسي البدعة المسماة النيش

العروسه عليها غرفة الصالون أحيانا السفره

(كم حقا أود أن أراه , المشكلة أن تلك التقسيمة تشعر أنها أعمق من قرار تقسيم فلسطين و قدسيتها تأتي و كأننا في أخوية سيون , طبعا ليست قابله للنقاش و هذا ما أتذكره الآن )
هناك اشياء فرعيه مثل شنطة المعلاق و السكاكين و أتذكر تلك المحادثة مع أميرتي عندما رأينا أحدهم

أنا : غريبه قوي دي
أميرتي : ايوه هو يا حبيبي اللي غريب ؟
أنا : محل زي دا حاطط قطع أثريه
أميرتي : فين دي ؟

أشير الي الحقيبه المكتوب عليها 1780

أميرتي : ليه بتقول أنها أثريه ؟

أنا ( ببراءة طفل يسأل عن حمض الكبرتيك) : من سنة 1780 تبقي أيه يعني ؟

أميرتي : دا مش رقم السنه

انا ( و كنت بدأت أتوجس خيفه ) : امال ايه ده؟

أميرتي : دي سعرها !!!

أعتقد أكتشاف أنك مصاب بالصرع في الشارع للاول مره ليست بالتجربة المفرحه علي الاطلاق او هذا ما اظنه , دعك من النيش للانه حقا محبط و مثير للتقيؤ هم يرون فيه مكان لحفظ الصيني أنا أراه معرض ل الهولوكوست لمنتجات الاخوة الصينين جيدة الكسر , لم أفهمه منذ صغري لماذا ناتي باشياء لكي نكسرها ؟؟؟ انا في الاساس لم أفهم فائدة الصيني أو النيش , قاتل الله الاثنين


بداية النهاية
(خطوات قليلة علي الدمار الشامل)

لطالما ظننت أنت مؤتمرات السلام أو أي مباحثات تدور يكون الغرض منها الأساسي هو أخذ الصور , دليلي هو , أنظر فقط إلي أي مؤتمر للسلام أو المباحثات " من أجل مجتمع خالي من دودة القز " , دائما بعد فشل أو نجاح المباحثات أو المؤتمرات , أول شئ يكون التصوير ,و الكلام في الفراغ بتحريك الشفاه فقط , تذكرت هذا و أنا أصافح حماي المستقبلي , ( دون القرون الخضراء , و عيون القط التي تميز المستقبلين ) , كنت أشعر أن الشيطان الأصغر الملقب بأخيها سيخرج آلة التصوير و يلتق بعض الصور , اتفقنا أنا و حماي علي تلك الأشياء السابق ذكرها ستأتي مباشرة بعد حصولي إما علي مصباح علاء الدين و بساط السندباد , و خاتم سليمان , أو أمانة الحزب الباطني , الغريب في الأمر و لم أفهمه أنه أعتقد أني امزح معه لدرجة أني رأيت ابتسامة قاحلة علي وجهه الذي لا يفرق كثيرا عن وجه أبو لهب عند سماع الآذان أول مر ة , غادرت و أنا أحمل خلفي ليس خفي حنين بل محل أحذية حنين بأكلمها بفروعها , الآن أنا مطالب بأظاهر حسن نيتي و جديتي في كلامي و ذلك خلال مدة 3 أو أربع شهور , (علي ما أذكر أن مريض السرطان في الحالة الثالثة يأخذ وقت أطول من ذلك لكي يقابل ربه ؟!!)
حقا كم أحبك يا أميرتي , دائما لا يأتي من ((خلفك)) إلا كل ما هو طيب , حماي هذا لم يترك لي غير أني أجري بعض الاتصالات لكولومبيا لعقد بعض الصفقات التي لابد و أن تكون ناجحة أو أبيع روحي للشيطان ولكني لا أعتقد أنه سيقبل لآني أعتقد أن الثمن سيكون بخس , الهاتف يرن الآن , يا الله أرجو إلا يكون هذا المخلوق المدعو عمي أكتشف أننا نسينا أن نحدد إذا كان فستان الفرح من تصميم دولتشي أند جبانا ولا من عند كلفين كليفين , لا حمدا لله أنها هي سبب حياتي و قريبا و حصريا مماتي ,
أنا : آلو ؟
هي : أنت أيه اللي عملته ده؟
أنا (مسترجعا ما فعلته لعلي فعلا غرست هذا الوتد الخشبي في قلب والدها ) : عملت إيه؟
هي : عريتني قدام أهلي
أنا : عريتك أزاي أنت أصلا مكنتيش قاعده و أكيد لو كنتي قاعده مش هعريكي
هي ( في غضب آلهة الاوليمب ) : ع ر ي ت ن ي , بقيت عره , زباله , حسيت أني في نص هدومي بسببك
أنا : لو كنتي في نص هدومك فده قول ظلم , لا تلوميني علي أنك لبستي نص هدومك بس
هي ( لا اعلم ما هو الصوت الذي صدر عنها و لكنه يشبه كثيرا تألم وحيد القرن وهم يشعلون النار في جسده وهي مازال علي قيد الحياة , تلاه غلق للخط , لا اعلم الفتيات فعلا سريعات الغضب
أخذت أفكر هل انا حقا اريد كل هذا ؟ آوه لا , لا تنظروا لي تلك النظرات قصدت علي النيش بألتاكيد و ليس الزواج , المشكلة أني أعتقد او أكاد أجزم أني أحبها تلك الساحرة المسماه (ثريا) و التي يطلقون عليها أسم (سؤسه ) في المنزل من باب الدلع و الرفاهيه , وليس من قبيل الاسم الكودي في المخابرات العامه , لا أعلم عندما أنظر أليها اجد أن العالم كله ينظر لي , و احيانا يخيل لي , ان العالم يشير ناحيتي و يضحكون , لمسة يدها الحانية ستظل في ذاكرتي الي أن اذهب الي قبري , صوت ضحكتها الرنانه التي تعتقد أن طائر السنونو قد أنتحر من السعاده لسماعه تلك الضحكه فهي مزيج من اختلاط الاحبال الصوتيه مع الطعام التي تتدخره دائما في فمها مع تصادم آني مع أسنانها ( الاسنان فقط تحتاج ملحمة أعمق و أخطر من ثلاثية مملكة الخواتم , و سادسية حرب الكواكب ) ,يعطينا في النهاية صوت خلاب ,أكاد أجزم أن هناك من يحسدني الان , ويقول في سره , ( ياليتني كنت مكانه ) , و لكني أقول له كما قال الشاعر المجهول ( هش هش يا ديك الفرخه دي (( تحديدا )) مش ليك ) , أقف في أنتظار أي وسيلة موصلات تصلني الي منزلي , تصلني رسالة علي هاتفي الخلوي فليذكرني أحد بتغير نغمة الرسائل الخاصه برقم محبوبتي فانا لا أعتقد أنه ملائم أن تكون أغنية " بحبك يا حمار " مخصصه لحبيبتي و لكن أعتقد أن رائعة أبو جريشه " 145 جنيه " ستكون ملائمه أكثر , أراهنكم أن أرسلت مُعلقة ولا مُعلقة " أبن هشام " , سيبكي نزار قباني في قبره بسبب رسالتها , أفتح الرسائل للاجد الرسالة الاهم في حياتي هي....



" كلمني شكرا "


آحمم .. طبعا أنتم تعلمون دائما ان خير الكلام ما قل ودل و كما ترون حبيبتي فعلت الخير و دلت عليه بأدبها الجام في عبارة شكرا , أجمل شئ ان في كل مرة أستلم منها رسالة يحدث لي مثير بعدها او مُبشر دائما و أكاد أشك رائحة الخير حولي , أقدامي تخونني و ترقص الرقص النقري , أشعر أن الناس كلها حولي أنقسمت ما بين مشجع و راقص , و الا لماذا يشير لي هذا الرجل الطيب المصري و يقول " خلي بالك من المشروع يا مغف.....


إظلام تام


لا اعلم و لكني أري تلك النجوم تتراقص فوق راسي و لكنها ليست نجوم , في الحقيقة لا أعلم ما حدث بالضبط هل حدثت لي حادثه ام عدت في الزمن بحيث يعلقوا لي تلك اللعب السخيفه التي يقولون عليها تسبب النعاس و كُنت دائما أرها لتنويم الطفل مغناطسيا , فأخر ما رأيته هو السائق و هو يفك 5 جنيه من سيارة أجرة و نظرة " راحت الخمسه جنيه " مرسومه علي وجهه بجودة تنافس دافنشي و الان أري تلك الاشياء فوقي , آه ه فهمت , انه بصل , ملاك الرحمة الخاص بتلك.. ماذا يطلقون عليها هنا؟ مستشفي نعم تشير الي انني نسيته في وجبتي التي أعتقد أنها عبارة عن تقيؤ طفل مصاب بسرطان الرئه المرحلة الاخيره و الا لماذا اري فوقها تلك العلامة الجمجمه و العظمتين تحتها و تبتسم لي , لكي أكل , ما أن أغمضت عيني و بدأت أن أكل , رن الهاتف كم هو أصيل هذا الهاتف و هذا العامل الذي آبي و أسكتبر ألا يأخذه , أنظر الي الرقم لاجده رقم , اللعنهههههههه , انها هي , ماذا افعل ؟ لقد أجبتها في مرة فها انا ذا أستلقي حفرة الجحيم , و تلك كانت مجرد رسالة فتخيل معي الرد علي مكالمة ...
انا : آلو ؟ ( في صمت يطابق صوت الصرصار قبل الدوس عليه )

هي : أنت في آنيه مستشفي ؟

أنا : آنيه ؟ انا كويس الحمد لله و متشكر علي السؤال

هي : انا معرفش مستشفي بالاسم ده

أنا : (سؤال هل سب الجد السابع تعتبر أهانة ؟!! ) لا مستشفي السلامه يا قلبي

هي : السلامه يا قلبي , ايه الزباله دي , علي العموم انا جايلك انا و ابويا

أنا : ( و انا أفكر في الابرياء الذين يصادف وجودهم في المستشفي , لهم رب ) يا سلام الحج بذات نفسه جي و الله يعني انا مش عارف اقول ايه

هي : لا اصل في حاجات ناسينا نتفق عليها و في كام بند كان غامض , و نسينا كمان القايمه و كمان ....

ساعتها كنت سرحت بتفكيري إلي مشهد فيلم ( المنشار Saw ) عندما تمت له عملية جراحية في المخ دون بنج و تخيلتني و أنا أفعلها و لكن بقلم رصاص ومنشار كهربائئ , كم سيفرحيني هذا بشده , لماذا تغيرت حبيبتي ؟ لماذا أصبحت كجلمود صخر حطه السيل فظبطه ؟ , يا لتلك الحياة و مفارقاتها , كم أود أن أف... ما هذا الصراخ , هل آتو بتلك السرعة , أنظر للرجل الذي بجواري , لا أعلم نوع مرضه تحديدا و لكني أري بعيني المجردة الثقب في عنقه الذي يهرش به باستمرار , أغلق عيني كمن سيعدمون بالرصاص , كم كنت أتمني أن أحظي بموهبة التنقل آلاني , كان زماني الآن في مجاهل المنتزه أو المعمورة , ولكنه القدر يا بني ,يدخل عمي يختال كأنه ذبابة فازت بمسابقة 100 متر تتابع , ينظر لي في قرف لا ينقصه غير التقيؤ فقط لتكتمل فرحته , فجاءة يتغير هذا الوجه إلي ابتسامة الكفار لحظة تعذبيهم لأحد القطط البرية , ينظر لي و يقول في ثبات انفعالي يحدثه عليه أحمد السقا في فيلم ( مافيا)

عمي : ( قاتله الله ) : ما أتكلمناش يا بطل في أهم حاجه في الموضوع

أنا : (و أنا مشبك أصابعي و أقراء من جميع الكتب السماوية إلا يقول ما أخافه خوفي للحصبة و سرطان القفا )
دا اللي هو إيه يا عمي ؟


عمي : النيش هتجبيه منين ؟




النهوايه .



الأحد، 18 يناير، 2009

يوم الاتنين بالصبح (اعلي سكور)

بسم الله الرحمن الرحيم
الاسكندرية ف 18/1/2009
10-10 مساءا
......................................
يوم الاتنين بالصبح
(اعلي سكور)
................................
بمناسبة الهدنه علي غزة اللي هي معيادها يوم الاتنين الصب تحديدا مش فاهم ليه مش العصر , ومش فاهم يعني ايه اصلا هدنه مع ( اللي متتسماش ) لان دا بالنسبة ليا كده عامله زي احتمالات ان جوزيه مدرب الاهلي فجاءة يدرب الزمالك حبا في جمال حمزة , الامر الذي يشبه تماما ان تري الخل الوفي عند مزلقان القطر , المهم.....

ان فيه هدنه اينعم هما بيعدوا بالطيارات علي ارتفاع منخفض , قال يعني بينغشوهم لان اسرائيل بطبعها فوكاهيه و تموت في الهزار , فدا لا يعتبر اي انتهاك للهدنه , ولا اي شئ ,

المهم حكاية غزة دي غريبة فحت و ردم و زعطت و كل حاجه مش مظبوطه , من اول ايام الراجل الكوباره الملتحي اللي تفتكره من الاخوه من حيث الدقن و زبيبة اكيد مش الصلاة , اللي اسمه (هرتزل) ما اسس دولة اللي ما تتسماش , و هو ( بن .... جوريون) وربنا اعلم بقي انا نيتي يبقي ابن ايه , قالوا كلمه واحد ان المعاهدات و الاتفاقيات و الامم المتحده او اي شئ اخر ميجيش علي هواهم
تبلوه و تحطوه في حتت كتير , و مع كده تلاقي الناس تقولك و هي مصدقه و تكاد عروقه الحساسه في اماكنها الحاسسه في الانفجار , من كتر الثقه ....

" الحل هو السلام و الاتفاقيات"

الكلمه الاكثر شيوعا الان هي.....

" الجلوس مره اخري مائدة التفاوض"

هنا أمرين يجب ان نسجلهم :

1-ان هناك مائدة سليمة في غزة تصلح الي اي شئ

2-ان واضح جدا ان الجلوس اول مره ريحهم بشده فاستحلوها

الدينا بتولع و الناس عامله تكح تراب , و قطر و سوريا و احنا و السعوديه و الكويت عاملين من باب التجديد نحلو علي بعض
لدرجة ان وزير يقول ...

"التنافس علي القمم صحي"

دا علي اساس اننا مشاركين في الاولمبياد و بنشتكي ان الملاعب مش مظبوطه , و الناس بقت تشتم بعضها في الدوله نفسها , وفي ناس مبسوطه ان في شهداء كتير , و تسمع كلام من نوعية ,

" شايف الاسلام و قوته "

و ينسوا ان الدول "العربيخه" معظمها قواتها متأجره و فيها قوات امريكيه اكتر من امريكا , و ينسوا ان ربنا قال :

" و أعدو لهم ما استطعتم "

لما لا مؤاخذه في الكلمة حبت عيال بس خد بالك ان العيال دي , دكاتره و مهندسين و علماء و من صفوة المجتمع اللي ميتسامش , يعني بيشتغلوا , مش قاعدين يدعوا علي العرب اللي هما اصلا شايفنهم اننا عاوزين نرمهيم في البحر من غير مايوه , و يكون بحر من الشواطئ المجانيه علشان يعرفوا ان الله حق , بيشتغلوا
اكبر كبير فيهم لاصغر صغير , خليه يعمل حاجه غلط هيتسحب علي قفاه علي المحكمة و بالجزمه , مع انهم كلاب و مش عارف اللي احنا فالحين نقولها ,

انا عمري ما هلوم ( اللي متتسماش ) ابدا انا بكن ليها كل احترام

ليه؟ اكيد عمي مش اسمه مسيو حنينيا و لا شئ

لانهم بيعملوا اي حاجه علشان مصلحة كيانهم , مش بيستنوا راي حد , حد يقدر في اي حته في العالم يشكك بس او يفكر ان يقول ان مثلا اللي اتحرقوا 599 مش 600 يالهوي يبقي راح ورا الشمس , بس مش ابعد مش الشمس بتاعتنا , ازاي حاجه بحجم ( اللي متتسمامش ) دي تطلع قرار بمعاداة الساميه.... و الله بتفكرني بماما ساميه , لانهم مش رجاله بس بيعرفوا يجبوا حقهم من بق اي حد

بيقولك خدوا راي مصر , تخيل كده الموضوع كان عامل ازاي انا هعمله كانه حوار مابين اتنين ستات...

اللي متتسماش : مساء الفل ( بالعبري اللي هو عباره بسكويت لوكس متكسر)

مصر : مساء التفاح

اللي متتسماش : كنا عاوزين رايكم في حوار كده

مصر : اتفضلي اختي

اللي متتسماش : و الله يا حبيبتي (غزة) تعباني و مدواخاني

مصر : معلش يا حبيبتي ثانويه عامه و هتعدي


اللي متتسماش : لا يا حبيبتي , ثانويه عامه دا انا مانعه من عليها كل شئ و الله من كتر غلبي كهربا و ميه و نور و غاز من اللي هو بتاعكم , و برضه مدواخاني

مصر : طب ما تقرصي عليها شويه بدل الدلع ده

اللي متتسمامش : و النبي يا ختي ما انا جيالك علشان كده , رايك كده يا حبيبتي , بس علشان الناس بتزعل مني لما بقول كده

مصر : مش انتي بتعملي كده علشان مصلحتها ؟

اللي متتسماش : طبعا دا انا بحبها و نفسي اعرف بس اعيش معاها , اينعم يا حبيبتي الوحده مننا بتتغابا لكن انتي عارفه ان قلبي ابيض من لبن التور

مصر : لبن التور؟

اللي متتسماش : دا جديد يا اختي عرفت اخلي التور يجيب لبن , طب استاذن يا حبيبتي و اسبيك انا , متشكره قوي , منجلكيش ف حاجه وحشه

النهاية

دا المفروض ان دا حصل و المفروض اننا نصدق ان ده حصل , و اننا كلاب و خونه وبعنا دم اخواتنا " هتدر" و علشان كده تلاقي ناس في دول كلمة مظاهرة بالنسبة ليهم شتيمه تقارب سب الدين يطلعوا بمظاهرة علينا احنا

و ف النهاية الهدنه هتكتب في الاسكور بتاع اللعبه , و هيتكب جنبها اعلي سكور لينا
و بالنسبة للشهداء و الدمار و كل شئ , مش مهم المهم القضيه
و من احب اشكر ( اللي متتسماش ) لانها وريت للدينا كلها الافواه الكدابه وهي بتطلع دبان , و ان الاطفال و الستات و العجائز و دار العبادة و الصحافة و كل شئ ليه قيمة مش مهم طالما الامان مفقود

و ان اي حد ممكن يقتل اي حد لو حس انه بيهدده

بس انا فرحان في هدنهههههههههههههههههههههههههههه

احيههههههههههههههههههههههههههههههه

يالهوييييييييييييييييييييييييييييييييييييي

يا خراشييييييييييييييييييييييييييييي

ايه رايك انت بقي؟

الخميس، 15 يناير، 2009

انشاء الله

بسم الله الرحمن الرحيم

قاتل الله ثلاثة

1- اسرائيل كجيش احتلال اثبت اننا متنا منذ القرون الاسفنجية اذا افترضنا ان هناك عصر يسمي هكذا او يرضي ان نطلق عليه او يلتصق به تلك الصفة اللي هي احنا


2-الامتحاناتتتتتتتتتتتتتتتتتتتتتتتتتتتتتتتتتتتتتتتتتتتتت وليس هناك سبب محدد

3- مش عارف

و لنا عودة انشاء الله