الخميس، 13 أكتوبر، 2011

عزيزتي الجلطة

اهداء الي القدم السليمة
:)

عزيزتي الجلطة
ازيك ؟ ايه الاخبار؟ احب اقولك انك وحشتيني قوي
انا عارف انك لسه موجودة
وانا عارف انك متضايقة مني
عارف كمان ان وجودك مهدد وجودي كله
بالزعل والاختفاء
بس صدقيني 
الفترة اللي فاتت مكنش قصدي خالص اخليكي 
تتضايقي وتقومي 
مكنش  قصدي انك تنشطي 
بس كنت محتاجك قوي 
لحاجات كتير
عارفه يا جلطة 
لما مش بتبقي حاسه باي شئ
باي شئ 
انتي مثلا اسمك جلطة ليه؟
علشان الدم بيتجمع في مكان وبيقف ف مكانه
مش بيجري ويبقي حر
متجلط
صح؟
انا تقريبا زي
متجلط
انتي بقي ساعات بتساعديني 
اني احس
اني اصلا عايش وان الريموت شغال
واني مش انسان 
عارف انك ممكن تزعلي مني
و ان زعلك مش لطيف
بس صدقيني
وانا عارف ومتاكد انك متاكده 
اني مكنش قصدي غير اني احس
باي شئ
حتي ولو بيكي
عزيزتي الجلطة
اوقات كتير 
بحسك وحيدة قوي
وانك غامضة قوي
حتي لما روحت للدكتور سكت
وبص عليكي ف الاشعة وقال
غريبة 
انت اللي ف سنك مينفعش تجليهم بالشكل دا
مفهمتش يعني ايه اللي ف سني؟
يمكن علشان كنت صغير وقتها؟
بس 
السن مش المعيار
صدقيني
مع اني صغير بس كبرت بدري 
وزيادة عن اللزوم
شوفت حاجات كان المفروض اشوفها اليومين دول
حسيت بحاجات 
مكنش لازم ولا ينفع احسها
بما فيهم انتي ع فكرة
انا عمري ما كرهتك
مع انك المفروض بتهددي حياتي 
بس انا واثق فيكي
لانك جوايا 
وعارفه كويس قوي
انا عامل ازاي
وياما ساعدتيني
عزيزتي الجلطة
أحببت ان اقول لكي بكل بساطة
أشكرك

هناك تعليقان (2):

عالمى ازرق يقول...

أحب تلك الزاوية المختلفة - التى منحتنى عند القراءة - التى تجعلنا نرى ذات الامور بعيون اخرى

تمنياتى لك بالشفاء العاجل والعودة السريعة لمدونتك

دمت بكل الخير

Die يقول...

اشكرك بشدة بشدة
علي متابعتك ليا
:))