بوصي بقي
عاوز اقولك علي كام شئ
كدا علشان بس انا جبت اخري
الحياة عمرها وعلاقتنا تحديدا
عمرها ولا عمرها ما هتكون فيلم سيما
انتي بتحبي تتفرجي علي الافلام العربي
وتعيطي و تقولي
آحيه بجد هو دا الحب
اللي انا بحلم بيه
احب اقولك ان دا عمره ما كان حقيقي
لو انا جيتلك ببدلة موف بالعربية وفضلت اضربلك كلاكس
وطلعلتك من الشباك
ومعايا بوكيه ورد وفضلت اقولك سامحيني
علشان زعلتك
الجيران هيطلعوا ف الغالب يسبوا الدين
وهيقولوا عليا اني شاذ
عمرنا لو اتقابلنا علي البحر
حتي لو متجوزين هبوسك ف بوقك
وهفضل اتمرغ انا وانتي ف الرملة
لان البحر فاضي ولان دي رومانسية
سيبك اننا هنتسحل سحلة الكلاب
سيبك من محضر الاداب اللي مستنينا
الرملة هتمرمط كرامة اهلينا
وهتكفر ايامنا
عمري ما هكون سكران وهجيلك تحت البيت
واقولك انا بحبك
وكلمني علي الموبيل
وانتي هتردي عليا
وهتخافي عليا
وتفضلي معايا ع الخط لغاية ما اروح
ولا كانك متربية في خمارة
وانا متربي زريبة
ولا كأن فيه عسكر
ولاكأن فيه جيران
مش هخونك مع كوكب الارض
واجي اقولك انتي عارفة اني بحبك انتي
مش هعرف كل الكوكب واقولك انتي اللي جوه القلب
مش هحطلك اعلان
اقولك اتجوزيني
ولا هتصل باسامة زفت اقوله مشكلتي
ولا هبعلتك رسالة علي شريط ميلودي
ولا بال mmu
ازاي بتقدري تشوفي ان دي رومانسية؟
وبعدين نفترض اني علمت دا
انتي عمرك
ما تستحقي اني اعلمك نسخة
من نسخة
انتي طبعة اولي
اصلية
الافلام فيها
cut
و
photo montage
بيدل علي مرور الوقت وتبدل الزمن
فيها كمان
تصاعد وهبوط مدروس
فيها سيناريو واضاءة
ومساعد مخرج
فيه مونتاج بنقطع القع السخيفة
والطويلة والمملة والمكررة
الحياة فيها انا وانتي
بس
انا بحبك بكل اشكالك
بحبك زي حبي لبلدي الغريبة دي
اللي بتكفرني بيها وفيها
بحبك وبعشق شعرك ولون بشرتك
اللي بيفكرني بالشيكولاته السايحة
الافلام العربي
يا اما حالمة
لدرجة العبط
يا واقعة لدرجة الالم
يا اما تافهة لدرجة الترجيع
يمكن انا مش حلو زي احمد عز
ومش 60 راجل ف بعض زي احمد السقا
ولا جسمي حلو زي اسر ياسين
بس انا عمري برده ما طلبت انك تكوني زي يسرا اللوزي
او مثقفة زي هند صبري
ولا تلبسي زي داليا البحيري
انا عوزك انتي
تكوني
فيلمي
قصتي
وسيناريوهي
وحواري
اخراجي ومونتاجي
اعلي ايرادت
واحسن راي نقاد
احلي بوستر ف اوضتي
انا بحبك انتي بطريقيتي وبطريقيتك
مش بطريقة افلام عمرها ما هتحصل
وبيضحكوا عليكي بيها
علشان ياخدو فلوسك
ودموعك
انا عاوزك انتي
بكل تفاصيلك وبكل ديفوهاتك
اقبليني زي ما انا
انتي مشاهدتي الوحيدة
وانتي جمهوري الوحيد
انتي اكبر شاشة عرض ليا
واحلي بكرة خام
صدقيني لما اقولك
ف كل مرة
اني بعشقك
أو بسئلك انتي ليه وازاي حبيتي واحد زي؟
أو بسئلك انتي ليه وازاي حبيتي واحد زي؟
بعشق ضوافرك المعمولة بلون مش باين
الكحل تحت عنيكي
الدبابيس الصغيرة اللي بتثبتي بيها خصلك
طريقتك وانتي بتخبي ضحتك
طرف ودانك اللي بتحكيه لما تتحرجي
حبيبتي
وستي وتاجة راسي
انا مش عاوز اكون فيلم عيد
او فيلم مواسم
انا مش مرحلة انتقالية
ولا حكومة اداء اعمال
انا مش عاوز بالخلود
لانه مش موجود
ومش عاوز كلام رومانسي
لان
كفاية اني بس اشوفك بتضحكي دي نعمة لا تقدر
انا عاوزك تدعيلي
عاوزك تحضنيني بقلبك
وتعنفيني بعنيكي
وتضحكيلي بروحك
عاوزك انتي
انتي
نجمتي المفضلة
أشكرك علي كونك
انتي
حبيبتي
هناك تعليق واحد:
لمرة الكنير اوي اقراها وفكل مرة بجد بتبهرني اكتر
وهميييييييييييييية بجد الاحساس الكلام الكوميديا اللي فيها عظيمة غظيمة غظيمة :)
إرسال تعليق