اهداء اليها اينما كانت...
.................................................
اول ما قومت الصبح النهارده..شعور واحد بس اللي ملك عليا كل شئ , اني اروح واشوفها مرة تانيه .. فضلت ماشيه ما بين كل شارع وشارع و... الراجل دا انا فاكراه كويس جدا دا اللي يوم الجمعة الصبح كنا بنزل نجيب السمك , علشان أكله
ايوه هو .. انا فاكراه .. يبقي انا ماشيه صح , بس السوق دا زحمة اكتر من ... المحل اهو ياما كنا بنقف قدامه علشان نوره والوانه كنت بحبه قوي
المشكلة مش فيها هي اكيد فاكراني كويس
لكن المشكلة فيهم هما... هما عمرهم ما هيفتكروني بسبب اخر مشكلة , بس للاسف مهما شرحت هما مردوش يسمعوني , لكن هما مجربوش فكرة انك تكون حامل واد ايه دا مرهق ومتعب , كل اللي شافوه عصبيتي , نسوا كل شئ ظروفي وحالتي وكل شئ , الا هي الوحيدة اللي فضلت
تيجي وتقعد جنمبي وتطبب عليا
وعلشان كدا حتي وبعد وان مشيت غصب عني
حتي وان مكنش قدامي اي فرصة للوداع
انا متاكد انها لسه فاكراني
وانها اول ما هتشوفني هتعرفني مهما شكلي اتغير
فاكره كويس لما كنا بنقف ف البلكونة او الشباك اللي ف اوضتها اللي اخر البحر , فاكره كويس لما كنا بنقف ونغمض عنينا وتبتدي تغني اغنية
او لما كانت بتبقي زعلانه وكانت تحضني قوي وتترمي جوايا وتحكيلي علي كل شئ
فاكره نظراتها
فاكره ابتسامتها اللي من غير صوت الا لو طولت
فاكره كل شئ .. كل تفصيلة .. جريها من المدرسة واول ما تدخل تفتح الباب وتدور عليا
متخليه يوم ما دخلت وملاقتنيش
لاني نفس الامر .. فجاءة بدون اي مقدمات لاقيت نفسي بتسحب بره كل شئ
البيت اللي عيشت فيه حياتي .. بعيدا عن احلامي وحبي
عن اولادي .. عنها هي .. عن كل شئ
فاكره الشريطة البمبي اللي مرة حطيتها عند ودني وفضلت تصورني وانا كنت ساعاتها سرحانة وبفكر ف ولا شئ
ولما بصتلها
ضحكت وقالتلي
" بحبك "
واقفه دلوقتي تحت البيت , يمكن تطلع
او تعدي
او حتي اشوف طيفها
انا مستعدة اتنازل عن السبع ارواح اللي عندي
مقابل
لحظة أخيرة معاها
فضلت واقفه
واقفه
ليست هناك تعليقات:
إرسال تعليق