شعر زائد

عمري ما فهمت المصطلح دا ابدا

"للازالة الشعر الزائد"

عرفت انه عند الحواجب والقدم واماكن تانيه اكتر خصوصية

ايه اهميته؟لدرجة الاهتمام بازالته؟

انه زايد      

عن ايه؟زيادة عن ايه؟

عن الطبيعي

اممم..نظرية بس مش هي دي القضية

سئلتني ف مرة

"هو انا حواجبي تقيلة؟"

بصيت ليها للمرة المليون لمراجعة اللي انا اصلا حافظه

"لا"

قالت

" انا اصلا ايش عرفك ف الحاجات دي , دا انت مش بتعرف تفرق ما بين الاي شادو والقطرة "

سكت وبصيت قدامي , الكلام فعلا مضايقنيش

وانا فعلا معرفش اي شئ ف العالم دا

قولتلها

" هو ينفع اسئلك سؤال , بلاش سؤال هو طلب ف الواقع "

قالت

" قول "

قلت

" ينفع بلاش تشيلي الشعر الزيادة اللي بيبقي عند آخر رقبتك وبالقرب من ودنك "

الجو اتكهرب فجاءة هي توترت وانا سكت وفضلت باصه قدامها علي ولا شئ

حاولت افهم مردتش , طيب انا اسف ,مكنتش اقصد , مردتش,انا اصلا مش عارف ايه اللي زعلها ف الكلام , مردتش

فجاءة قامت وقالتلي " انا عاوزه اروح "

وانا ف الطريق علشان اركبها قولتلها

"انا مش عارف انتي زعلتي ليه , ولا ايه ف كلامي يكون ضايقك , بس انا حبيت اقولك اني بس شكلك بيهم بيبقي عامل زي الوردة اللي بشوكها , زي القمر بالسحاب , يعني ف كل الاحوال انتي قمر و وردة , حبيت اقولك دا بس وانا برده اسف لو ضايقتك وانا مش عارف ازاي "

 

السؤال

هي عينها دمعت ليه؟

هي ليه مبصتش ليا لما ركبت وبدا التاكسي يتحرك ليه؟

مرضتش ترد علي اتصالاتي ليه؟

وف الاخر بعتلي رسالة فيها كلمة واحدة " بحبك " ليه؟

 

فعلا مش قادر استوعب اللي حصل

وفعلا مش قادر افهم ايه المشكلة

الوش الرايق دا مفهوش اي زيادة او نقصان

الحواجب المرسومة من عند ربنا مش محتاجة اي شئ

شعرها اللي بيخلي الاحلام ليها ابعاد كتيره مش محتاج يتقص الاطراف علشان يطلع من جديد او لما تبقي مخنوقة تروح تقص القوصه

ملمسها الحريري اللائق بطفلة ف اول شهور ليها ف الحياة مستحميه مش محتاج اي ازالة للاي شئ , دا حتي العرق بيخيلها تلمع

 

اتقالي

اصل انت مش فاهم , دي حاجه محرجة وقليلة الادب انك تقولها لبنت

 

افتكرت نظراتها وصمتها المطول وعينها اللي كانت بتهرب مني

بس هي عارفه كويس جدا

اني كنت بقولها رايي بشكل واضح

كنت بقولها اني مش فاهم غير دا وحتي لو انا مفهمتوش

وحتي لو انا مش مستوعبه

فهي ف كل الاحوال حبيبتي

مفهاش اي شئ زيادة بالنسبة ليا

ولا اي شئ ناقص

هي من هي

 

سكت , مشيت جوه نفسي الاول لغاية ما وصلتلها في الحقيقة

قالت

" انت حمار و ومش بتفهم , خلي الشوك ينفعك يا فالح "

ضحكت

ومشيت جنمبها .

وصية لمن يهمه الامر

بسم الله الرحمن الرحيم
انا مبحش شغل الافلام العربي وبتاع
انا بكتب الكلام دا علشان الموضوع كل يوم بيقرب
مرة خرطوش علي مرة جلطة تانيه علي مرة حاجات لسه هتبان بكره وبعده ف التحاليل
: )
ف يعني ان من الناس اللي مش بتحب تلاعب الزمن لاني عارف انه هو الكسبان
ف دا لا شغل دراما ولا اوفره ولا اكتئاب ولا اي شئ
دا انا


6-8-2012


1-الناس اللي فعلا بتحبني ارجوهم يعني ميسبوش ابويا و امي لوحدهم , هما اكتر ناس بيحبوني وهما اكتر ناس انا بحبهم ف الناس اللي بيحبوني خليكوا معاهم يعني تبادلوا الحب دا


2-هدومي ومتعلقاتي الشخصية كلها يتم التبرع بيها في الخير 


3-لما تسمعوا التراك دا دايما افتكروني 


4-انا عمري ما كرهت حد , اينعم مستوعبتش حاجات كتير بس عمري ما كرهت حد الا بني ادمة واحدة بس كرهتها فترة لكنها دلوقتي بقت ام لطفلة ربنا يخليها ليها هي وزوجها


5-انا ف الغالب جرحت ناس كتير سواء عن عمد او عن غير عمد , سواء خدت بالي او مخدتش بالي لمصلحتهم من وجهة نظري او لا 
احب اقولهم كلهم انا اسف


6-يبقوا كلموا ربنا عليا : ) وقولوا ليه اني بحبه 


7-مش عاوز اي شكل من اشكال الحداد ولا 3 ايام ولا ولا يوم عاوز الناس تفكر ف نفسها وتسئل وتقول
هي دي فعلا حياتي اللي انا عاوزاها؟
ويرمي ورا ظهره اي تقل 
ويشوف حلمه ايه


8-انا تقريبا حققت احلام كتير  ليا , يمكن فاضلي حاجات بسيطة نتيجة لكسلي بس الحمد لله


9-انا عمري ما عرفت اقفل بابي ف وش حد حتي لو ظهر العكس بس لما يحصل المراد واقابل رب العباد اعتقد برده اني مش هقفل بابي 
: )


10-حبوا ربنا بلاش  تخافوا منه


الاسكندرية في 6-8-2012
02.20