الخميس، ١ ديسمبر ٢٠١١

صمت مطول

صدقني دا افضل بكتير"
انت بس حاول تتسوعب كلامي
كل اللي بقوله ليك ان الحياة ساعات بتخلينا ناخد قرارت
مش شرط نكون بنحبها بس لازم نعملها
انت عارف اد ايه انا بحبك
وعارف كمان ان...."

أصبح كلامها مبيوصلش لودني من فترة طويلة
مجرد شفايفيها بتتحرك وانفعالات وشها دا اللي انا شايفيه
كلام كتير عن بكرة وعن مستوي وعن تعليم وعن حياة مشتركة
كلام كتير لو فتحت اي جورنال هتلاقيه
او اي مسلسل عربي
السؤال اللي كان في بالي
هي البنت اللي بحبها راحت فين؟
للحظة حسبتها بتهزر
للحظة حسبت انها بتشبه عليا وهتقوم وتعتذر عن سؤء التفاهم
كلام تاني عن الصبر
كلام تاني عن الحلال والحرام
كلام تاني عن اي شئ تاني غيرنا
كلام تاني عن الكلام التاني
كلام من غير كلام
قناع الواثقة الهادئة المسيطرة
قناع البنت العملية
خالني اضحك

قولتلها

" تمام انتي عاوزه ايه دلوقتي ؟ "

بهتت فجاءة سكتت
بلعت ريقها و
قالت

" مصطفي بوص انت احسن شخصية ...

مقدرتش استحمل باقي الجملة
انفجرت من الضحك
لدرجة اني عيني دمعت من فرط الضحك الحقيقي
من غير مبالغة
انا بكره الكلاشيه
بكره المقدمات
بكره الاقنعة

قولتلها

" بوصي احسن شخصية والف بنت تتمناني , وخلي النهاية تبقي لطيفة
وكل الكلام اللي علي الوزن دا مالهوش لزمة , بكل بساطة انتي عاوزه العلاقة تتنهي بشكل واضح وبسيط صح؟ "

ردت بعد فترة من الصمت

" قولي علي حل تاني ؟ "

رديت

" حل؟ معلش فكريني كدا في المقدمة والكلام دا كله فين جزئية النقاش او الحل؟ انتي جايه بتقولي ليا شئ واحد وعامله تكرري فيه , الحل كان قبل دا , لو فيه فعلا حل مكنتيش تقولي دا "

سكتت شربت جزء من العصير من اللي قدمها
فضلت باصص ليها بثبات
انا عارفها لما بتتوتر وهي بتعمل كل شئ بيقول انها فعلا كدا
اللحظات اللي شبه دي
عامله زي وجود شوكة في زورك
ومش عارف تتعامل معها ازاي عاوز تتنفس بس كل ما تتنفس كل ما الشوكة توجعك 
اكتر

مع كل دا كان نفسي امسك ايديها
اقولها سر للمرة الاخيرة
مع كل دا كنت عاوز احكي حكاية اخيرة خيالية
نصها عنها ونصها التاني منها
لكنها فضلت مستمرة في الكلام
وفضلت انا في احلامي
   

هناك تعليقان (٢):

عالمى ازرق يقول...

احيانا يغيب عنا احبتنا ، لنجد اخرين - يشبهونهم ملامحهم - فى هذه الحالة .. ان احببت بصدق
فتش عنهم واسترجعهم لقلبك مرة اخرى

دمت رائعا

rania gheath يقول...

بتحصل كتيييييييييييييييييييير ما هو البنات بيخافوا يجرحوا الواد فيبدأوا ببداية اتعلموها في كل الافلام :) وعادي يعني بتعدي يا صديقي