الأحد، 14 فبراير، 2010

لما تحس


بسم الله الرحمن الرحيم

انا مش قادر أفتكر هو قالي فاضل اد ايه؟ بس اديني هلحق اقول اي حاجه و زي ما تيجي بقي!!

لما تحس أنك عاوز تجري بأقصي سرعة ليك لغاية ما عضلاتك تتحرق

لما تحس انك واقف علي ارض كلها شوك مسموم ساخن

لما تحس بقدرة غريبة علي الطيران دون أجنحة أو أي مساعدة

لما تحس وانت راكب الاتوبيس أنك وحيد تمامااااااااااااااا

لما تحس أنك غير مرئئ مجرد كائن شفاف أي حد يمكن أختراقه

لما تحس انك صندوق زباله أي حد ممكن يعدي ف أي وقت يرمي زبالته وترجعيه الفكري دون ابداء اي شكر او تعاوم مستقبلي

لما تحس برهبة غريبة من ضوء الشمس و من اصوات الناس وكأنك طفل رضيع يستجيب لاي مؤثر حوله

لما تحس شعور مركب ف عمق البحر ف شهر طوبة او امشير بينما علي السطح ان مبتسم

لما تحس شعور الطفل اللي الايس كريم بتاعه ساحت قدامه عينه وهو مش فاهم ايه اللي بيحصل ولا قادر يمنعه

لما تحس انك نفسك بجد انك تمتلك القدرة علي الانتقال الاني من مكانك الي اي مكان ف الارض

لما تحس بشعور الديجا فو أو الرؤية المتكررة لنفس تفاصيل حياتك - السخيفة- للاسف بنفس الثبات مع التغيير الوحيد هو ازياد الالم بشدة

لما تحس ان خلاص دي اخر مره هتنام وانت تبكي - تفكر - تلعن كل شئ - تتنمي انك متقموش





لما تحس ان يارب الوقت يقف او يجري بسرعه لعل الاتي افضل

لما تحس شعور قعدتك ف امتحان سخيف طويل وانت لا تعرف حرف وعامل تبص علي الوقت علشان نص الوقت يجي و تطلع

لما تحس بشعور كالسحر بعد يوم طويل من الارهاق البدني و الذهني و المشاعري بمجرد ملامستك لفراشك الابدي

لما تحس ان فيه أكتر من مئة مسدس مصوبين علي دماغك ويتم بالفعل اطلاق النار ولكنك لا تموت بل مثل سيزيف يعيد تمثيل تلك الحركة بمنتهي الهدوء

لما تحس بشعور الحمار ف مطلع مع عربجي بشع الاخلاق لن يتورع عن جلدك لمجرد انه يرضيه

لما تحس بشعور التربي الذي لم يعد يفرق معه رؤية الموتي من كثرتهم

لما تحس بشعور عصفور أثناء طيرانه ف ظل نوة وبعد محاولاته يكتشف ان عشه انهار

لما تحس شعور وحيد القرن -يوني كورن- وانه محبوس ف جنينة الحيوانات او شعور الدرافيل ف مدينة الانتاج

لما تحس بفوبيا الاماكن المغلقة او الضيقة ولكنك تتضطر ان تعيش ف تابوت للشق التاني من حياتك

لما تحس انك ليتك كنت شاذ علشان متعرفش واحدة زي اللي انت عرفتها وحبيتها

لما تحس شعور الغابات وهي عارية تماما من اشجارها

لما تحس بشعور انك ف نهائي كأس العالم و انت من سيدد ضربة الجزاء اللي ستحسم الامر لفريقك او للفريق الاخر و تضيعها و الادهي الحارس يتصدي لها

لما تحس بشعور العجوز الذي يقف ف صف التأميانات وعندما يصل يكون الشباك أغلق او يا حج دلوقتي بالكاريدت كارت

لما تحس بشعور واحدة تتعالج من السرطان بالكمياوي وكل من يراها يسئلها هي شعرك فين؟ و الاشد من هذا انها تعمل ف كوافير

لما تحس ان كلامك لا يسبب غير ضوضاء شديدة و في احسن الاحوال ان ستمع اليك احد لا يفهم شئ علي الاطلاق

لما تحس انك عاجز عن الكلام و عن التعبير وعن اي شئ , وان أحن شئ لك هو سريرك و كرسيك

لما تحس ان جدران غرفتك بقت بتضيق ف كل مرة انت بتاخد نفسك

لما تحس أن فكرة الصمت هي أفضل أختراع وجد علي الاطلاق

لما تحس ان أقرب اصدقائك هم مغنين روك ومياتل لانهم يشعورن بنفس شعورك وألمك

لما تحس اصلا ان ال.... اه معلش

الوقت خلص

نهايته لما تحس اصلا دا هيبقي شئ رائع لكن لو حسيت بكل الحاجات دي ف فالغالب هتكون انا
خد بالك مني بقي
اشوفك بقي

ليست هناك تعليقات: